පවුලක අම්මා හෙවත් නිවසේ ප්‍රධාන කාන්තා චරිතය විදිහට සිටින ඔබ නින්දට යන්නේ නිවසේ හැමටම පසුව බව නොරහසක්.
ඒ අතරම ඔබට එක හුස්මට නින්ද නොයා යහනේ ඒ මේ අත පෙරලෙමින් නින්ද ඇයි නොඑන්නේ කියන මැසවිල්ල නැගීමට සිද්ධ වෙනවාද…? නින්ද තාවකාලික මරනයක් වුනත් ඔබේ මානසිකත්වය නින්දට බලපානවා. රාත්‍රි නින්ද නිසි විදිහට නොලද විට පසුදිනයට අවශ්‍ය උද්‍යෝගය ඇති වෙන්නේ නැහැ. ඇමරිකා එක්සත් ජනපදයේ සිදු කරන ලද අධ්‍යනයකට අනුව එරට ජනතාවගෙන් මිලියන හතක් පමණ පිරිසක් නින්ද නොමැති වීම නිසා අපහසුතාවයට පත්ව සිටිනවා. යහපත් පරිදි නින්ද නොයන තත්වය දිගු කාලයක් පවතින විට මානසික වෙහෙස, සංකුලතාවය වැනි අපහසුතාවයන් ඇති වෙනවා. මේ නිසා පවුලේ අම්මා විදිහට ඔබ නිසි විදිහට නින්ද ලැබීම අවශ්‍යයි.
සුවදායක නින්දක් ලබන්න ඔබ කැමැති නම් වගේම නින්ද යෑමේ විවිධ පැමිණිලි තිබෙනවා නම් පහත සඳහන් පුරුදු ඔබේ ජීවිතයට පුරුදු කර ගන්න. එවිට නින්ද ඔබට ගැටලුවක් නොවේවි..
නින්දට පෙරාතුව අනුගමන කළ යුතු පුරුදු
නින්දට පෙර ඔබේ ශාරිරික හා මානසික සැහැල්ලුව ඇති කර ගැනීම ඉතාම වැදගත්. නින්දට පෙර මුහුණ කට සෝදා ගෙන ලිහිල් ඇදුමක් ඇඳුමක් ඇඳීම වගේම මානසිකවත් ඔබ නිදහස් විය යුතුයි. ඒ නිසා නින්දට පෙරාතුව කැමැති තමන්ගේ ආගමික වතාවත් වෙනුවෙන් යොමු වීම ,පොතක් කියැවීම හෝ භාවනාවක යෙදෙනවා නම් නින්ද ගැන ගැලුවක් ඇති වෙන්නේ නැහැ. පොත්පත් කියවීම මගින් හිතේ පවතින දුක සහ විවිධ ගැටලු වලට සහනය ලැබෙන අතර එයින් ආකල්පය වර්ධනයක්ද සිදු වෙන බව ඇමරිකාවේ සුප්‍රකට වෛද්‍යවරයෙක් වූ ජෝසි බිරින්ටන් සදහන් කරනවා.
නිදන කාමරයේ පැහැය
අද බිත්ති වර්ණ ගැන්වීමේදී එහි පිරිවැයට සමගාමීව තවත් බොහෝ දේ ගැන උනන්දු වීම වැදගත්. වර්ණ මගින අපේ සෞඛ්‍යටත් යම් යම් බලපෑම් ඇති විය හැකි බව බටහිර වෛද්‍ය විද්‍යාවට අනුවත් පිලිගෙන තිබෙනවා. නිදන කාමරයේ වර්ණය මගින් ඇති වෙන ආලෝකය නින්දට බලපෑම් ඇති වෙනවා. මේ නිසා නිදන කාමරය වෙනුවෙන් වඩාත් ගැලපෙන්නේ අදුරු පැහැයක් බව දැන් පිලිගෙන තිබෙන නිසා ඔබගේ නිදන කාමරයේ බිත්ති වෙනුවෙන් අදුරු වර්ණය ගල්වන්න. එවිට නින්ද ගැන ගැටලුවක් ඇති නොවේවි.
ව්‍යායාම
අද බොහෝ කාන්තාවන්ට අනේ අපිට හුස්ම ගන්න වෙලාවක් නැහැය යන කථාන්දරය කිව්වත් ඔවුන් කරන වැඩ කොටස් වෙතින් සිරුරට ව්‍යායාම ලැබෙන්නේ නැති තරම්. බසයෙන් හෝ පුද්ගලික රථයෙන් ගමනේ යමින් කාලය ගෙව්වත් සිරුරට කිසිම ව්‍යායාමයක් ලැබෙන්නේ නැහැ. එහෙම අයට නින්දට ගියාම නින්ද එන කාලය බොහොම ප්‍රමාදයි. ඒ නිසා දවසේ සිරුර වෙහෙසන කටයුතුවල නිරත වුනා නම් ඔබට නින්ද වෙනුවෙන් නොදැනම සිරුර සකස්ව තිබෙන බව අමතක නොකරන්න.
ආහාර
රාත්‍රි ආහාරය වෙනුවෙන් සීමා පනවා ගත යුතුය යන අදහස අලුතින් එක්වුවක් නොවේ. වෛද්‍ය විද්‍යාත්මකව වගේම බුදුරජාණන්වහන්සේ පවා රාත්‍රි ආහාරය ගැන සීසාවන් බනවා ඇති නිසාම අපිට රාත්‍රි ආහාරය ප්‍රමාණාත්මකව අඩුවෙන් ගත යුතු බව අලුත් දෙයක් නොවේ. ඒ වගේම ප්‍රමානාත්මක අඩුවීම වගේම සීනි සහ කැලරි ශක්තියෙන් අඩු ආහාර ගැන අවධානය ලබා දෙන්න. රාත්‍රි ආහාරය නිතරම වේලාසනින් ලබා ගන්න. අපි බොහෝ දෙනෙක් කරන්නේ රාත්‍රි ආහාරය සමග නින්දට යෑමයි. ඒ වෙනුවට ඔබ රාත්‍රි ආහාරය ටිකක් කල් තබා ලබා ගෙන බලන්න.
කැෆේන් අඩංගු පාන වර්ග
කැෆේන් මගින් නිදිමත දුරස් කරන නිසා නින්දට ආසන්නයේදී කැෆේන් අඩංගු පාන වලින් ඉවත් වෙන්න. ඒ වගේම නින්ද ආසන්නයේදී ජලය පානයත් සීමා කිරීම වරදක් නැහැ. එසේ ජලය පානයෙන් ඔබ විටින් විට මුත්‍රා කිරීමට අවදි වෙන අතර එයින් පසුව නින්දක් බිදුනා යැයි චෝදනා නගනු ඇත.
තිරය සහිත උපකරණ හා තාක්ෂනික උපකරණ
අද බොහෝ දෙනෙක් තමා නිදා ගන්නා කාමරයේම රූපවාහිනිය හා පරිගණකය තබා ගෙන සිටින්නේ නිදිමත එන තෙක් හෝ වැඩක නිරත වීමටයි. ඒත් වෛද්‍ය විද්‍යාඥයන් පෙන්වා දෙන අන්දමට මෙම උපකරණ කාමරයේ පවත්වා ගෙන යනවා නම් එයින් නින්දට ඇති කරන්නේ බලපෑමක් බව අමතක කළ යුතු නැහැ.කැනඩාවේ ඔන්ටේරියෝහි බටහිර විශ්ව විද්‍යාලය සහ බ්‍රිතාන්‍ය මොළය හා මනස පිලිබද ආයතනය් ස්නායු විද්‍යාඥ මහාචාර්ය ඒඩ්‍රියන් එවන් විසින් නින්ද අඩුකම මොළයට බලපාන අන්දම අලලා අධ්‍යනයක් සිදු කිරීමට අදහස් කරනවා. මෙහිදී නින්ද ලබන ප්‍රමාණය අනුව මොලයේ බලපෑම අලලා අධ්‍යනයක් සිදු කිරීමට අදහස් කරන අතර ඒ අනුව යහපත් සෞඛ්‍ය තත්වයක් වෙනුවෙන් නින්ද ලබන පැය ගණන හදුනා ගැනීමට අදහස් කරනවා. කෙසේ වුනත් නිවස සහ දරුවන් මුල් කර ගෙන වෙහෙසෙන අම්මා
ලෙසින් ඔබ සුවදායක නින්දක් ලැබීම අවශ්‍ය බව නම් අමතක කරන්න එපා. දිගින් දිගටම ඔබ නින්ද නිසි විදිහට නොලබනවා නම් මානසිකව ඔබ තුල ඇති වෙන වෙහෙසකර තත්වය ජීවිතයේ සාමාන්‍ය කටයුතු පවා වියවුලක් බවට පත් වෙන නිසා සුවදායක නින්දක් ලබා ගැනීම ඉතාම වැදගත්.
About The Author
